Syg wie de wottsch

Jä unsri ney Fasnachts-Blaggedde
Het ussergweenlig vyyl Facette
Dr Guido Happle het se disaint
Und die ganzi Fasnacht so veraint
E Harlekin und au e Pierrot
Jä au en Ueli gseht me do
Drzue kunnt no e Blätzlibajass
Und au e Waggis us em Elsass
Die Alti Dante ganz adrett
Macht so die Rundi no komplett

E Drummle und e Piccolo
Dien fir d Clique dodruff stoh
Mit sym Stägge git exaggt
Dr Major aa no scheen dr Taggt
Unter em Himmel mit de Stärne
Lyychtet häll e Stäggeladärne
Und schliesslig gsehsch no z letsch emänd
S het ebber Zeedel in de Händ
Dr Vortrab isch so au drbyy
S will jo kai Clique ohni syy

E Helge jä dä isch do dängg
Fir unsri gliebte Schnitzelbängg
E Zoggeli – und das isch klar
Isch jo e Waggis-Accessoire
Und so sin d Wääge unsri nätte
Beschtens jetz do au verdrätte
E Pauker paukt no binere Gugge
Und fillt so no die letschti Lugge

E jede freut sich ab em ander
E heerrlig Gwiehl e Duurenander
Wies numme an dr Fasnacht git
Und alli mache friidlig mit
Wo duets das denne sunscht no gää
Me darf ys gärn als Vorbild näh
Und jede so wien är grad will
Farbig, lutt und als au schrill
Eso verstoot jetz jede Dottsch
S Fasnachts-Motto «Syg wie de wottsch»

Das isch dr Kärn – das isch d Idee
Maint s Fasnachts-Comité

Die Fasnachtsplaketten können ab dem 4. Januar 2025 bei jedem Gugge-IG-Verein gekauft werden.